Na Wilma Mmbone
AFC Leopards walidhalalishwa na kushushwa hadhi
walipotitigwa magoli 4-1 mikononi mwa Kakamega Homeboyz kwenye mchuano wao wa
raundi ya 22 kwenye ligi kuu ya KPL , mchuano uliosakatwa katika uga wa Mumias
Complex siku ya Jumapili.
Andrew Kulecho aliwaweka wenyeji Homeboyz kifua mbele mnamo
dakika ya tano kabla ya Sunday Mutuku kuongeza la pili dakika nane baadaye.
Andrew Murunga alitikisa wavu wa ingwe mnamo dakika ya 28 na kuwafanya Homeboyz
kumiliki kipindi cha kwanza cha mchezo.Kocha wa AFC Leopards Ivan Minnaert
alimpumzisha Paul Kiongera huku mfungaji bora katika klabu hiyo Kepha Aswani akichukua
nafasi yake.
Aswani aliifungia Ingwe bao
la kuliwaza moyo katika dakika ya 44 ila furaha ya ingwe ilizimwa na mchezaji
Eugene Ambulwa aliyejifunga na kuwazawadi Homeboyz goli la nne na la ushindi
kabla ya kipindi cha kwanza kutamatika. AFC Leopards sasa wameteremka hadi
nafasi ya kumi kwenye jedwali na alama 28 huku Homeboyz wakipanda hadi nafasi
ya nne na alama 33.
Wachezaji wa Kakamega Homeboyz wakisherehekea ushindi dhidi ya Leopards.
Kwengineko Gor Mahia waliandikisha sare ya tatu mfululizo
hii ni baada ya Posta Rangers kuwakaba koo na kuhakikisha wameishia sare ya
kutofungana. K’ogalo walionyesha hamu ya kutaka alama tatu kwenye mtanange huo
kwa kumiliki mchuano wote ila ulinzi wa Posta Rangers uliimarika na kuhakikisha
kuwa makali ya Gor Mahia hayapenyezi lango lao.
Gor mahia aidha wanasalia katika nafasi ya pili kwenye
jedwali na pointi 37 pointi nne nyuma ya viongozi Tusker. Posta Rangers
wanamiliki nafasi ya tisa na pointi 29.
0 comments:
Post a Comment